1 наурыз «Алғыс айту» күні М.Әуезов атындағы ОҚУ «Рухани жаңғыру және ҚХА» орталығы және «Шаңырақ» Қазақстан халқы Ассамблеясы кафедраларының Қауымдастығы» Республикалық Қоғамдық бірлестігі бірлесе отырып «Ұрпақтар ұмытпайды…» атты Республикалық синхрон-видео лекцияны өткізді.
Ел тарихында 1 наурыз – бірегей конституциялық институт – Қазақстан халқы Ассамблеясының құрылған күні. Биыл 27 жылдық белесті бағындырған бұл институт Қазақстанның сындарлы жолмен дамуына, жасампаз істердің жаршысына айналды. Тәуелсіздіктің толағай табыстарында елімізді мекендеген түрлі этнос өкілдерінің үлесі бар. Осы кезеңдегі басты жетістігіміз – Қазақстан халқының бірлігі болса, ырысты ынтымағымыз – бейбіт аспанымыз бен еселі еңбегіміздің жемісі болды.
«Ұрпақтар ұмытпайды…» атты Республикалық синхрон-видео дәріске «Тарих және педагогика» факультеті «Саясаттану» кафедрасының доценті, философия ғылымдарының кандидаты – Қорғанова Саипжамал Султанқызы өз баяндамасын жасады. Баяндама барысында көпұлтты еліміздің бір шаңырағының астына жиналған ұлт пен ұлыстың осында қоныс аударуының түпкі себебінде жер аудару саясаты жатқанын атап өтті. Көптеген елдерден тәркілеуге ұшыраған халықтар қоныс аударған. Зобалаң көрген осы адамдардың елімізді жерсініп, сіңісуіне жергілікті тұрғындар – қазақтардың рөлі зор болған. Сондықтан Алғыс айту күні деп аталатын осы меркенің аталып өтуі бұл қазақстан жерін мекендеген халықтардың біздің ұлтымызға деген алғысы болып табылатындығын атап өтті.
«Мұнай газ ісі» кафедрасының профессоры, химия ғылымдарының докторы, ҚР мемлекеттік сыйлығының лауреаты — Надиров Казым Садыкович 1 наурыз Алғыс айту күніне күніне орай қазақ еліне Алғысын білдіре отырып, бейнеарнауын жолдады. Сонымен бірге, Шымкент өңірлік саяси қуғын-сүргін құрбандарын толық ақтау жөніндегі комиссияның Жұмысшы тобының университеттік зерттеушілері экспедициялық зерттеу барысыныда сұрау салу нәтижесінде табылған 1938 жылы 8 жылға сотталған, Ақмола лагерлік бөлімшесінде, Карлагта жазасын өтеген Адия Фазыловна Шамгунованың немересі — Османова Рашида Акимовна қатысып, апасының бастан кешкендерін, репрессиялық жазалау кезінде көрген қиындықтарына тоқтала отырып, Қазақ еліне деген шексіз алғысын білдірді.
Мереке барысында «Алғыс шеруі» де болып өтті. Шеруде өзге этнос өкілдерінің ұрпақтары Қазақ еліне деген өздерінің риясыз алғыстарын білдірді. Мереке соңында қатысушалар мұндай кездесулердің жастар тәрбиесіндегі маңызы зор екендігіне тоқталып, халықтар арасындағы достықты нығайтып, өзара түсіністік үшін өте қажет екенін баса айтты. Мереке концерттік бағдарламаға ұласты.
