Ағайынды Бексұлтан мен Ерсұлтан Алиевтер – түрік ұлтының өкілдері. Ата-бабасы Қазақстанға жер аударылып, осында мекендеп қалған. Қиын-қыстау күні төрінен орын беріп, өзектен теппеген қазаққа атасының алғысы ретінде шығарған өлеңін бүгінгі ұрпағы жатқа оқиды.
БЕКСҰЛТАН АЛИЕВ – ТҮРІК ЭТНОСЫНЫҢ ӨКІЛІ (ӨЛЕҢ)
Сәлем беріп, сәлем алдым,
Жаса, жаса, сен, қазағым.
Домбыраңды тартып, ән салдым,
Жаса, жаса, жан қазағым.
Мейман сыйлап, шай береді,
Қымыз, ет, май береді.
Тойларында тай береді,
Жаса, жаса, сен қазағым.
Ал, Джейран Сулейманидің түбі ирандық. Оның да ата-бабасы тағдыр тәлкегімен Қазақстанға жер аударылып келген. Бертін келе қазаққа сіңісіп, бүгінде бауырдай араласады.
ДЖЕЙРАН СУЛЕЙМАНИ – ИРАНДЫҚ ҚЫЗ — Қазақ еліне ұлтымыздың атынан алғысымды білдіремін! Жер аударылғанда ата-бабамды жатсынбағаны үшін.
Қазіргі таңда Қазақ жерінде 130 дан астам ұлыс өкілдері тұрады. Бірінің тарихи тамыры ортақ болса, енді бірі тарих тауқыметімен келіп қалған. Соның әр қайсысының да қазаққа айтар алғысы бар.
ДАНИЛ ИВАНОВ – СЛАВЯН ҰЛТЫНЫҢ ӨКІЛІ — Барлық славян халқының атынан қазақтарға, Елбасымызға алғысымды білдіремін. Біздің осындай тыныш, бейбіт, тамаша мемлекетте өмір сүріп жатқанымызға рақмет.
Пейілі мен мейірі тасыған қазақ түрлі ұлт өкілдеріне төрін беріп, тоқашымен ғана емес той-томалағымен бөлісіп келеді. Сондықтан, Елбасы Н. Назарбаев 2016 жылы 14 қаңтар күні 1 наурызды «қазақтарға алғыс айту» күні деп жариялады.
НҰРСҰЛТАН НАЗАРБАЕВ – ҚР ПРЕЗИДЕНТІ — Мен алғыс айту күні еліміздегі ең басты мерекеге айналарына сенемін. Бірліктің қадіріне жете алған елдің келешегі кемел. Мен алғыс айту күнін осындай мақсатпен белгіледім.
Облыстық әдет-ғұрып және салт-дәстүр орталығына жиылған, бір шаңырақ басын біріктірген түрлі ұлт өкілдері ән салып, әңгіме дүкен құрды. Олардың ортақ Отаны – Қазақстанға деген алғысы шексіз.
«Ақпыз, қара сарымыз, ағайынбыз бәріміз! Елімізде, өңірімізде, қазақылықтың қаймағы бұзылмаған аймақта алғыс айту күні осымен екінші рет атап өтілмек. Қазақстан – ортақ Отанымыз! Ендеше, еліміздің еңсесі тік, халқы құт болғай! Хормен: МЫҢ АЛҒЫС САҒАН, ТУҒАН ЕЛ!»
