Отырар ауданының бюджет кірісі 110 пайызға орындалып, кәсіпорындарда 14 млрд. 149 млн-ның өнімі өндірілген. Жүгері өңдеу бойынша аудан облыста көш бастаған. 2016 жылдың қорытындысы бойынша, кәсіпкерлікке қолдау көрсеткен аудан әкімдігі үздік деп танылған. Десе де, ауыл шаруашылығы саласында мәселелер жоқ емес. Ауруын ашып айтқан аудан басшысы жердің құнарлығын арттыру мақсатында жұмыстар атқарып келеді екен.
«Отырар — Оңтүстіктің туризм кластерін дамытушы орталыққа айналуы тиіс». Бұл өңір басшысының тапсырмасы. Осы жылы «ЭКСПО-2017» халықаралық көрмесі өтетінін ескерсек, туристер үшін арнайы маршруттар Отырар ауданын да қамтитын болады.
Аудан әкімінің өткен жылы атқарған есебі баяндалғаннан кейін, жарыссөзге жазылған тұрғындар Отырардан дарын мектебін ашу, елдімекендерді газдандыру сынды ұсыныстарын айтып, аудан әкімінің есебіне оң бағасын берді.
Есептік кездесуге қатысқан облыс әкімінің орынбасары Ұласбек Сәдібеков Отырар ауданында атқарылар жұмыстардың әлі де бар екенін айтты.
Ал, аудан басшысы Ерлан Айтаханов есептік кездесуде тұрғындар тарапынан берілген оң бағаны «аванс» ретінде қабылдайтынын айтып, алдағы уақытта бірлесе жұмыс жасауға шақырды.
